Vendas de automóbiles: Un termómentro da economía
Estaba claro que as axudas á compra dun vehículo ben artelladas funcionan. O mercado deixou patente esta apreciación ao longo do ano pasado. As primeiras axudas gobernamentais que se presentaron en 2009 foron o malogrado Plan VIVE. Este, dende o primeiro momento, foi mal visto polos distintos actores no mercado automobilístico. Mentres que este plan demostraba, con datos estatísticos, que non era o adecuado, unha comunidade autónoma como Navarra decidía libremente dar axudas directas á compra dun automóbil. O Goberno central tardou en reaccionar, incluso cos datos xa na man e vendo tamén como empezaban a cambiar as vendas en países europeos que daban incentivos directos para mercar un coche.
O presente chámase 2010. Diversas asociacións nacionais e autonómicas están a transmitir ás distintas administracións implicadas a necesidade de manter e dotar presupostariamente un Plan 2000E para todo este ano.
Neste mesmo número o secretario xeral da Asociación de Concesionarios de Galicia, Saro Posse, analiza os resultados do sector en 2009 e fala das perspectivas de vendas para este ano. Puntualiza que 2010 será complicado, se a Xunta non se suma á prórroga do Plan 2000E. Por outra banda, tamén nestas mesmas páxinas, a través dos datos que nos proporcionaron as dúas asociacións máis importantes do sector a nivel nacional, ANFAC e GANVAM, podemos ver a necesidade de aplicar xenerosamente un Plan 2000E para todo este ano. É vital para toda a industria automobilística e tamén para a economía do país.
“A unión fai a forza”. Esta frase quedou patente cando a Administración central, a autonómica, os fabricantes e os concesionarios remaron na mesma dirección. Ou sexa, puxeron a súa propia contribución para mercar un vehículo entregando outro para chatarra. Nese punto as vendas comezaron a virar de negativas a positivas. Era o que levaba demandando, dende había meses, todo o sector do automóbil.
Empezamos un novo ano con dous semestres moi marcados inicialmente, só que con signos contrarios. O primeiro, cunha dotación económica para que funcione o Plan 2000E, ten signo positivo; o segundo, posiblemente negativo. A previsión é que na segunda metade do ano se esgote a partida presupostaria do Plan 2000E e ademais subirá o IVE dous puntos. Ante estes dous ciclos tan diferentes, os fabricantes e os concesionarios están “avisando” da necesidade de sumar esforzos para que as vendas sigan un curso á alza. Tamén chama a atención que o mercado segue moi baixo, aínda que as vendas dos últimos meses do ano pasado eran superiores comparadas coas de 2008, un ano onde a caída de vendas foi catastrófica.
O consumidor que estea pensando en adquirir un coche novo terá que andar moi espelido, pois en principio todo indica que os automóbiles terán mellores opcións de compra na primeira metade do ano. A segunda é unha incógnita. Inicialmente parece que, de non cambiaren as cousas, mercar coche nos últimos seis meses será máis custoso.
Sempre queda a posibilidade, e a esperanza, de que volvan a sumar esforzos todos os actores que interveñen neste mercado para resolver 2010 dunha forma satisfactoria. Se os índices de vendas dos automóbiles son positivos, o termómetro da economía nacional probablemente tamén será deste signo.
|
